རབ་བྱུང་བརྒྱད་པའི་ཆུ་ཁྱི། སྤྱི་ལོ་༡༥༠༢ ལོར། ལྡོང་གི་རིགས་ཡབ་ཆོས་རྒྱལ་རིན་ཆེན་དཔལ་བཟང་དང། ཡུམ་བཀྲ་ཤིས་ཨ་མཚོའི་སྲས་སུ་གཙང་ལ་སྟོད་དུ་འཁྲུངས། དགུང་ལོ་བཅུ་བཞི་པར་ཡོངས་འཛིན་བློ་གྲོས་རྒྱལ་མཚན་ལས་དགེ་བསྙེན་དང། གཙང་བཀྲ་ཤིས་ལྷུན་པོའི་ཆོས་སྒོར་ཞུགས། རྒྱལ་བ་དགེ་འདུན་རྒྱ་མཚོ་ལས་དགེ་ཚུལ་གྱི་སྡོམ་པ་བཞེས་ཏེ། མཚན་བློ་གསལ་རྒྱ་མཚོ་གསོལ། ཆོས་རྭའི་རྩོད་གྲྭར་བཞུགས་པས་གཞན་གྱི་ང་རྒྱལ་བཅོམ་ཞིང་དད་པ་ལ་བཀོད། སྐབས་ཤིག་ནས་ཞབས་སྙུང་བར་རྒྱལ་བ་དགེ་འདུན་རྒྱ་མཚོས། དེའི་བཅོས་ཐབས་སུ་རྡོ་རིང་པའི་དྲུང་དུ་མངག་པ་ལས། རྗེ་བཙུན་རྡོ་རིངས་པ་ཐོག་མར་མཇལ། རྗེས་སུ་ཁའུ་བྲག་རྫོང་དུ་རྗེ་བཙུན་རྣལ་འབྱོར་མའི་ལུང་བསྟན་དང་། རྗེ་རྡོ་རིངས་པའི་བཀའ་ཕེབས་པ་ལྟར་བྱོན་ཏེ། ལོ་བདུན་གྱི་བར་དུ་ལམ་འབྲས་སློབ་བཤད་ཐེངས་གསུམ་དང། ཚོགས་བཤད་ཐེངས་གཉིས། ལྷག་པར་རྗེ་འདི་ཁོ་ནར་བཞུགས་པའི་ཆིག་བརྒྱུད་མན་ངག་བཅས་དུ་མ་གསན། དགུང་ལོཉི་ཤུ་རྩ་བཞིར། འཕན་པོ་ནཱ་ལེཎྜའི་ཚོགས་ཆེན་ལ་ལམ་འབྲས་གསུངས་པར་ཀུན་གྱིས་བསྟོད་ཅིང་བསྔགས། དགུང་ལོ་སོ་གཅིག་པ། ཆུ་འབྲུག་ལོར། ཁ་ཆེ་པཎ་ཆེན་གྱི་སྡོམ་རྒྱུན་ཆོས་རྗེ་གྲགས་པ་རྒྱལ་མཚན་དང། ཆོས་རྗེ་བཀྲ་ཤིས་རྣམ་རྒྱལ་སོགས་ལས་བསྙེན་པར་རྫོགས། གཞན་ཡང་རྗེ་འདིས་བཀའ་དྲིན་ཆེ་བའི་བླ་མ་ཉེར་བདུན་དང་། མཁན་སློབ་དང་བཅས་པའི་ཡོངས་འཛིན་དྲུག་ཅུ་རེ་གསུམ་བསྟེན་ནས། ཆོས་རྗེ་ཁུ་དབོན་ལྟར་བོད་དུ་བཞུགས་པའི་ཆོས་ཕལ་ཆེར་གསན་པ་དང་། ཁྱད་པར་ས་སྐྱའི་བསྟན་འཛིན་ངོར་རྫོང་གཉིས་ཀའི་ཆོས་སྐོར་གསན་ཚུལ་ནི། ཉིད་ཀྱི་ཞལ་ནས། ཨེ་ཝཾ་པ་ནི་བསྡུས་ལ་སྤྲོས་པ་ཆུང་། །མུས་སྲད་པ་ནི་དཀར་ཆག་ཁྲིགས་ཆགས་ཅན། །
རྡོ་རྗེ་གདན་པ་འཆམ་དང་ནུས་པའི་བདག། །ཁོ་བོས་ཐོབ་པའི་ཐུན་མོང་བརྒྱུད་པ་གསུམ། །
ཞེས་གསུངས་པ་སོགས་བསྟན་རྒྱུན་མཐའ་དག་གི་བདག་པོར་གྱུར། ད་དུང་གནས་མཆོག་ཁའུ་བྲག་རྫོང་། མང་མཁར། ཆུ་བོ་རི་སོགས་སུ་སྒྲུབ་པར་གཞོལ། དགུང་ལོ་སོ་བཞི་པར་ཐུབ་བསྟན་དགེ་འཕེལ་གྱི་གདན་ས་དང་། དགུང་ལོ་ཞེ་གཉིས་པར་འདར་སྟོད་ཆོས་འཁོར་གྱི་ཁྲིར་ཕེབས་ཤིང་། དགུང་ལོ་ང་བཞི་པར་དཔལ་ཞ་ལུའི་ཁྲི་པ་ཡང་མཛད་དེ། བོད་བརྒྱུད་ནང་བསྟན་སྤྱི་དང་། ས་ལུགས་ངོར་རྫོང་བུ་ལུགས་དང་བཅས་པའི་རིང་ལུགས་ཀུན་བཀའ་དྲིན་གྱིས་བསྐྱངས། ལྷག་པར་དུ་རྗེ་བཙུན་རྡོ་རིང་པའི་བཞེད་སྲོལ་ཁའུ་བྲག་རྫོང་པའི་རིང་ལུགས་ཤིན་ཏུ་དར་ཞིང་རྒྱས་པར་མཛད།
མཐར་དགུང་གྲངས་རེ་ལྔ་པ། རབ་བྱུང་དགུ་པའི་མེ་སྟག སྤྱི་ལོ ༡༥༦༦ ལོར་བདེ་བར་གཤེགས།